Қызылжарда көктемгі су тасқынының алдын-алу мақсатында бөгет тұрғызылып жатыр

Солтүстік Қазақстан облысы соңғы 5 жылда су тасқынынан зардап шегіп отыр. Биыл теріскейде 15 елді мекенде жүздеген үй суда қалды. Былғары зауыты кентінде бұған дейін де бөгет болған. Бірақ, тасқын кезінде оны барынша нығайтқанымен, елді мекенді судан қорғай алмады. Ал, жаңа нысанның ұзындығы 3 шақырымнан, биіктігі 5 метрден асады. Құрылысқа бюджеттен 2,6 млрд. теңге бөлінді. Мердігер компания жұмысқа  70 техника мен 280 адам жұмылдырған. Материалдар Көкшетаудан әкелінген.   

Ерлан Назарбаев, мердігер компания өкілі:

- Материалды толығымен  жеткіздік. 400 мың шаршы метр топырақ пен тас әкелінді. Қазір бөгетті бетон плиталармен нығайтып жатырмыз. Бөгет құрылысы бойынша жұмыстың 75 пайызы орындалды.