Қарағанды облысында құтқару жұмыстары жалғасуда

Қарағанды облысында су тасқыны қауіп төндірген аймақтарда апаттың алдын алу, құтқару жұмыстары жалғасып жатыр. Әсіресе, төтенше жағдай жарияланған үш ауданда ахуал күштік құрылымдардың жіті назарында. Облыс бойынша тасқын су қауіп төндірген елді мекендерден бүгінгі күнге дейін 1906 адам эвакуацияланған. Қазір Қарқаралы, Бұқар жырау және Абай аудандарындағы төтенше жағдайға байланысты сақтық шаралары күшейтілген түрде жүргізілуде. Әсіресе, Бұқар жырау ауданына қарасты Чкалов, Садовое ауылдарындағы жағдай мүшкіл. Біраз үйлерге су кірген. Қазір қос елді мекендегі баспанасын су шайған тұрғындар уақытша Ғабиден Мұстафин ауылына көшіріліп, осындағы мәдениет үйінде тұрып жатыр.

Руслан НҰРЛАНҰЛЫ