Басты Жаңалықтар «Қорғас ісі» бойынша тергеу аяқталды

«Қорғас ісі» бойынша тергеу аяқталды

11.03.2014 08:30

10 айға жуықтаған атышулы «Қорғас ісі» бойынша тергеу аяқталды. Бүгін Ішкі істер министрлігіне қарасты СИ-18 уақытша оқшаулау абақтысының әкімшілік ғимаратында жарыссөз алдындағы соңғы тергеу амалдары өтті. Айыпталушылар, олардың қорғаушылары мен сот орындаушылары ғасыр қылмысының әр ісін пысықтап, қайта сүзгіден өткізді.

Естеріңізге сала кетейік, «Қорғас ісі» - тәуелсіз ел тарихындағы ең ауқымды әрі атышулы қылмыстық процесс. Ұлттық қауіпсіздік комитеті мен Кедендік бақылау ұйымының қызметкерлері құзіретін асыра пайдаланып, Қорғас, Қалжат, Достық кеден бекеттерінде жемқорлық жүйесін қалыптастырған.

Шекара арқылы өтетін контрабандалық тауарлардың кедергісіз өтуіне жол беріп, кәсіпкерлерді пара беруге мәжбүрлеген. Қаржы полициясының деректеріне сәйкес, қылмыстық топ шекарадан өткен әр жүк көлігінен 25-30 мың долларға дейін ақша алып, жүздеген миллион доллардың дүние-мүлкін пайдаға жаратып отырған.

Бір жарым мың томға жүк болатын қылмыстық іс бойынша 45 адам айыпталушылар қатарында. Істің ақ-қарасын ашуға 48 адвокат, 38 қорғаушы тартылған. Куәгерлерден жауап алынған соң, 13 наурыз күні жарыссөздер басталады. Айыпталушыларға үкімдер жариялана бастайды.

Жазира ИСАЕВА

Бөлісу