Басты Жаңалықтар Әскери бөлімдердегі тексеріс 7 күн ішінде баяндалады

Әскери бөлімдердегі тексеріс 7 күн ішінде баяндалады

28.09.2026 17:05

Оқу-жаттығу кезінде әскери қызметшілердің қаза табуы жалпыұлттық қасіретке айналды. Мемлекет басшысы осы оқиғаға қатысты барлық мәселені, яғни зардап шеккендерге көмек көрсету, оқиғаның мән-жайын жан-жақты әрі объективті түрде тергеуді тапсырды.

Қаржы және әскери бөлімдердің материалдық-техникалық базасына аудит жүргізіліп, жеті күн ішінде баяндалады. Бұдан бөлек Мемлекет басшысы он күн ішінде Қорғаныс саласын реформалаудың арнайы жоспарын әзірлеуді талап етті. Қорғаныс министрлігінің бірқатар лауазымды тұлғасы күдікті ретінде ұсталды. Қазір тергеу амалдары жалғасып жатыр.

Бұл туралы Вице-Президент Ерлан Қарин телеграм арнасында жариялады.

«Қазақстан Халық Кеңесінің мүшелері, Құрылтай депутаттары, саяси партиялардың өкілдері, кәсіпкерлер, меценаттар және басқа да азаматтар қаза тапқан әскери қызметшілердің отбасына қолдау көрсетуге дайын екенін білдірді. Қысқа мерзім ішінде қаражат жинау ісінің жедел әрі ашық жүргізілуін қамтамасыз ететін арнайы қор құрылды. Сондай-ақ Қазақстан Халық Кеңесінің мүшесі Бекмұрат Жүсіпов басқаратын қоғамдық комиссия жасақталды. Комиссияның негізгі міндеті – жиналған қайырымдылық қаражатын әділ әрі ашық бөлуді қамтамасыз ету. Жұртшылықтың алдағы уақытта да қабылданған барлық шара туралы уақытылы әрі ашық ақпарат алып отыруы қамтамасыз етіледі. Ең бастысы мемлекет тек жедел әрекет етіп қана қоймай, оқиғалардың түпкі себептерін жоюға бағытталған жүйелі әрі кешенді шешімдерді қабылдауда», - деп жазды ол телеграм парақшасында.

Автор

Ақниет Балтанова

Бөлісу