Елде 38 700 отбасы АӘК алады

Елде 38700 отбасы атаулы әлеуметтік көмек алады. Мемлекет басшысы жолдауында әлеуметтік көмек пен жәрдемақыны шынайы мұқтаж жандар ғана алуы тиіс деп ескерткен еді. Қазақстанда табысы төмен отбасыларға әлеуметтік көмек көрсетумен қатар, олардың жұмыспен қамтылуы да жолға қойылған.

1 тамыздағы дерек бойынша, Қазақстанда 38 700 отбасы атаулы әлеуметтік көмек алды. 388 мыңнан астам адам жұмысқа орналасты. Оның 293 мыңы тұрақты жұмыс тапты. Әлеуметтік көмек пен жұмыспен қамту шараларын қатар жүргізу арқылы екі маңызды міндет шешіледі. Біріншісі – қиын жағдайға тап болған азаматтарға қажетті қолдау көрсету. Екіншісі – олардың алдағы уақытта өз табысын өзі қамтамасыз етіп, экономикалық тұрғыдан дербес болуына жағдай жасау.