Қызылорда облысында 17 мыңнан астам бала бірінші сыныпқа барды

Бүгін Қызылорда облысында 17 мың 700 бала алғаш рет мектеп табалдырығын аттады. Жаңа оқу маусымында ең көп оқушыны Абай атындағы дарынды балаларға арналған мектеп қабылдаған.

Әділбек Серікұлы, тілші:

Биыл қаладағы тарихы терең Абай мектебінде 4500-ден астам оқушы білім алады. Сән-салтанатымен алғашқы қоңырау соғылып, жаңа оқу маусымы басталып кетті. Ал бірінші сыныпқа биыл 407 бала қабылданып, 15 сынып ашылған. Әрине, бұл демографиялық өсімнің көрсеткіші. Бала санының жылдан жылға көбейуіне байланысты 2023 жылы мектеп ауласынан бастауыш сыныптары үшін қосымша 550 орындық жаңа ғимарат салынған. Мұнда 22 оқу кабинеті, 2 мультимедиа сыныбы бар. Яғни, балалардың сапалы білім алуына барлық жағдай жасалып отыр. Және сабақтан тыс уақытта қосымша үйірмелер де жұмыс істейді.

Абай мектебінің тағы бір ерекшелігі үш тілде тереңдетілген білім беретін арнайы сыныптар бар. Өткен оқу маусымының қорытындысымен 209 түлек жоғары оқу орындарының грантын иеленген. Соның тоғызы шет елде білім алады. Биыл да білім ошағы осы жетістігін ұлғайтып, білім сапасын арттыруды көздейді.