Непалда тасқыннан қаза тапқандар 900-ден асты

Непалда алапат тасқыннан қаза тапқандар саны 900-ден асты. Ізім-қайым кеткендердің де саны көбейіп, 4200-ден асып отыр. Тасқын кезінде құрылысы аяқталмаған су электр станцияларының туннелдерінде жүздеген жұмысшы қалып қойған. Оларды құтқару операциясы күні-түні жүріп жатыр. Құтқарушылардың жұмысын ауа райының қолайсыздығы қиындатып отыр. Оның үстіне болжамдарға сай, өңірде жаңбыр жаууы ықтимал. Непал мен Тибет шекарасында су тасқыны тамыздың 26-да болды. Гималай тауында мұздық құлап, өзенге топырақ пен тас төгіліп, төмендегі елді мекендерді нөпір су шайып өткен.

Бахата Радж Тхапа, жергілікті тұрғын:

Төрт күн өтті. Ауылымызға баратын жол қалмады, байланыс пен электр  қуаты да жоқ. Телефонымыз өшіп жатыр. Ауылдастарымыздың талайы хабарсыз кетті. Оларды не тірі, не өлі табамыз деп осы жерде мәлімет күтіп жүрміз. Кейбір жерлестеріміз туыстарын өздері іздеуге кетті.