Соңғы сайлау учаскесі жабылды

Құрылтай сайлауына ең соңғы болып Сан-Францискодағы отандастарымыз дауыс берді. Қаладағы №472 сайлау учаскесі Астана уақытымен екі сағат бұрын, яғни таңғы сағат 08:00-де жабылды. Дауыс берушілердің басым бөлігі Калифорния штатында уақытша немесе тұрақты тұратын Қазақстан азаматтары. Олардың қатарында студенттер мен Кремний алқабында жұмыс істейтін мамандар бар.

Назира Нұрбаева, Қазақстан Республикасының Сан-Франциско қаласындағы Бас консулы:

Қазіргі сәтте сайлау бойынша дауыс беру аяқталды. Бүгінгі сайлауға отандастарымыз Лос-Анджелестен, Сан-Францискодан, Кремний алқабынан келді. Дауыс берушілер арасында, әсіресе, АҚШ-та білім алып жатқан студенттер басым болды. Біреуі қазақтың дәстүрлі күйін орындап, бәрімізге ерекше көңіл-күй сыйлады.