Сайлау барысын 2284 байқаушы қадағалады

Жамбыл жеріндегі Құрылтай сайлауын 2284 байқаушы жіті бақылады. Олардың 14-і – халықаралық байқаушы. Жалпы алғанда облыста 520 сайлау учаскесі жұмыс істеді. Сол дауыс беру орындарындағы науқанның талапқа сай өтуі байқаушылардың басты назарында болды. Олар тең құқылы қоғам мүддесі үшін мүмкіндігі шектеулі жандарға жасалған жағдайды да жіті қарады. Мәселен өңірде мүгедектігі бар 45 884 дауыс беруші бар. Олардың 2 600-ге жуығы қамқорлыққа мұқтаж. Сондықтан сайлау учаскелерінде сондай жандар үшін арнайы ақпараттық бұрыштар орнатылған. Қамкөңіл жандарға 60-тан аса сурдоаудармашы  қызмет көрсетіп, 41 инватакси тасымалдады.