ІІМ: Қоғамдық тәртіпті бұзғандар жоқ

Құрылтай сайлауы басталғалы қоғамдық тәртіпті бұзып, келеңсіздік тудырғандар жоқ. Елдегі жағдай тұрақты. Бұл туралы Ішкі істер министрлігінің ресми өкілі Шыңғыс Әлекешев онлайн марафон аясында өткен брифингте айтты. Сайлау учаскелері тексеріліп, тәулік бойғы күзетке алынған. Сондай-ақ министрлік өкілі полицияның дауыс беру процесіне араласпайтынын атап өтті. Тәртіп сақшылары сайлау комиссиясының төрағасы шақырған жағдайда ғана учаскеге кіре алады.

Шыңғыс Әлекешев, ҚР Ішкі істер министрлігінің ресми өкілі:

Ішкі істер министрлігінде жедел штаб жұмыс істеп жатыр. Елдің барлық өңірінен ақпарат үздіксіз, онлайн режимде түсіп отыр. Қазіргі уақытта елдегі жағдай тұрақты. Қоғамдық тәртіпті өрескел бұзу фактілері тіркелген жоқ.