БҚО-да BalaQorgany AI жаңа цифрлық платформасы таныстырылды

Өңірде балаларға қатысты қылмыс саны азаймай отыр. Әсіресе жасөспірімдер арасында топтық қылмыс 5-тен 16 дерекке дейін өскен. Оның ішінде тонау, ұрлау, бұзақылық деректері бар. Қылмыстың алдын алу үшін құқықбұзушылық жиі болатын мектеп пен колледждер бақылауға алынған. Жаңа оқу жылында 382 мектепте 128 мыңға жуық бала білім алмақ. Олардың қауіпсіздігін қамтамасыз етуге күзет қызметі, бейнебақылау камералары, турникет, өзге де жүйелер іркіліссіз жұмыс істеуі тиіс. Психологиялық көмек көрсетіліп, цифрлық қауіпсіздік дағдысы қалыптастырылады. Облыс прокуратурасы әзірлеген BalaQorgany Ai платформасында сауалнама жүргізу, «Check-in» және «SOS» модульдері, мектепішілік есеп, сараптамалық бөлім қамтылған. Кеңесте уәкілетті органдар арасында платформаны енгізу туралы меморандумға қол қойылды.