Студенттерден қомақты ақша үптеген ақтаулық сотталды

Ол жоғары оқу орындарында білім алатын студенттердің сеніміне кіріп, оқуына қатысты мәселелерді ақшаға шешіп беруге уәде еткен. Атап айтқанда, емтихандарды сәтті тапсырып, жоғары баға алуға көмектесетінін айтқан. Ол үшін студенттерден 70 мыңнан 1 миллион теңгеге дейін ақша алған. Алайда уәде етілген көмекті көрсетпей, қаражатты жеке қажеттіліктеріне жұмсаған. Ақтау қалалық сотының үкімімен ер адам алаяқтық жасағаны үшін кінәлі деп танылып, 3 жыл 9 айға мерзімге бас бостандығынан айырылды. Осы оқиғадан кейін құзырлы орган өкілдері тұрғындарды жаңа оқу жылы қарсаңында сақ болуға шақырды. Әсіресе, оқу процесіне заңсыз жолмен көмектесуге уәде беретін адамдарға сенбеуге кеңес берді.