«Болашақ ойындары – 2026» турнирі аяқталды

Астанада халықаралық «Болашақ ойындары – 2026» турнирі аяқталды. Жүлде қоры 4 млн 65 мың доллар болған турнир еліміз үшін жаңа спорттық бағыттарды дамыту мен халықаралық тәжірибе жинақтаудың маңызды алаңына айналды. Қазақстан киберспорт, ақпараттық технологиялар, телетрансляция, инженерия, логистика, қауіпсіздік және ірі спорттық жарыстарды өткізу салаларында жаңа кәсіби дағдылар мен тәжірибе алды. Сонымен қатар бұл Астананың дамуына және Қазақстанның туристік тартымдылығына орасан зор үлес қосты. Сегіз бағыт бойынша «Болашақ ойындары» чемпиондары анықталды. Қазақстандық Team KZ командасы Phygital Shooter CS 2 дисциплинасы бойынша жеңіске жетіп, 50 мың доллар иеленді.