Алматы облысында БАКАД жол ақысын кешіктіргендер жоғары тарифпен төлейді

Енді Алматыдағы БАКАД тас жолында жол ақысын жеті жұмыс күні ішінде төлемегендер үшін тариф өседі.

Яғни жүргізушілер жол ақысын кешіктірсе тариф шамамен екі есеге дейін қымбаттайды. Жаңа ережеге сәйкес, төлем көлік құралының санатына қарай 605 теңгеден 1 900 теңгеге дейін есептеледі. Ал жол ақысын уақытында төлегендер үшін бұрынғы тариф сақталып, төлем мөлшері 300 теңгеден 950 теңгеге дейін болады. Жалпы жол жүру құнын есептеу тәртібі өзгермейді. Жүріп өткен қашықтық жол ақысының мөлшеріне әсер етпейді. Сондай-ақ Алматы облысының Талғар, Қарасай және Іле аудандарының тұрғындары үшін қолданыстағы жеңілдіктер сақталады. Айлық және жылдық абонементтердің бағасы өзгеріссіз қалады.