Қостанайда жастар өзен жағасын жинап жарысты

Қостанайда жастар Тобыл өзенін бойлай, қоқыс жинап жарысты. «Таза Қазақстан» акциясы аясында ұйымдастырылған іс-шараның басты мақсаты – қалдық сұрыптау мәдениетін қалыптастырып, жастар арасында экологиялық жауапкершілікті дәріптеу. Ойынға 50-ден аса ерікті қатысты. Олар белгіленген аумақты қоқыстан арылтып қана қоймай, жиналған қалдықтарды түріне қарай іріктеп, дұрыс сұрыптау мәдениетін тәжірибе жүзінде меңгерді.

Нұрсұлтан Дауылбай, Қостанай облыстық жастар ресурстық орталығының маманы:

Акция барысында жастар айналаны таза ұстауды ғана емес, қоқысты сұрыптауды да үйренеді. Мысалы, шыны бөтелкелер мен пластик қалдықтарды бір бөлек, резеңке бұйымдарды екінші бөлек жинайды. Сондай-ақ басқа да қалдықтарды түріне қарай сұрыптап, оларды дұрыс жинауды үйренеді.