Металлургтер жарты жылда 258 миллиард теңгенің өнімін өндірді

Қостанай облысында металлургия саласы қарқынды дамып келеді. Соңғы үш жылда оның өңдеу өнеркәсібіндегі үлесі 23 пайыз болған. Мәселен, осы жарты жылда кәсіпорындар құны 258 млрд теңге болатын өнім өндірген. Сонымен қатар өңірде бұл салада ірі инвестициялық жобалар жүзеге асып, жаңа зауыттар іске қосылып жатыр. 2028–2035 жылдары құны 6 трлн 4 млрд теңге болатын үш жаңа өндіріс орны ашылмақ.

Ділдәбек Масалимов, облыстық Кәсіпкерлік және индустриалдық-инновациялық даму басқармасы бөлімінің басшысы:

Мемлекет басшысы Қазақстан халқына Жолдауында өңдеу өнеркәсібін дамытудың маңызын ерекше атап өтті. Қостанай облысы бұл бағытта көшбасшы өңірлердің біріне айналып, былтыр республикада 4-орынға көтерілді. Бұл – табысты іске асқан инвестициялық жобалар мен жаңа өндіріс орындарының нәтижесі.