Астананың инженерлік инфрақұрылымын дамытуға ₸16,2 млрд бөлінді

Үкімет Астананың инженерлік және энергетикалық инфрақұрылымын дамытуға 16,2 миллиард теңге бөлді. Қаражаттың басым бөлігі қаланың кәріз жүйесін жаңғыртуға жұмсалады. Қолданыстағы кәріз коллекторы қайта салынып, тазартылған ағын суларды Есіл өзеніне жеткізетін жаңа желі тартылады. Сондай-ақ тағы 7,5 миллиард теңге энергетика саласына бағытталды. Жаңа қосалқы станса салынып, екінші жылу электр орталығының турбоагрегаты жаңартылады. Нәтижесінде электр желілеріне түсетін жүктеме азайып, 80 мыңға жуық тұрғын тұрақты электрмен қамтылады. Сонымен бірге жаңа мектептер, емханалар және басқа да әлеуметтік нысандарды іске қосуға мүмкіндік бар.

Аталған жұмыстар бізде жыл сайын өзінің жалғасын табуда. Яғни жыл сайын әкімдік тарапынан жаңа энергетикалық объектілерді реконструкциялау, сонымен қатар қосымша жаңа объектілерді іске қосу бойынша үлкен жұмыстар іске асырылады. Аталған турбиналарды модернизациялау - сол жұмыстардың бірі. Оны жасағаннан кейін біздерде қосымша екінші ТЭЦ-тен 30 мегаватт қуат алуға мүмкіндік аламыз.