Басты Жаңалықтар Алматы облысының Қарасай ауданына су берілді

Алматы облысының Қарасай ауданына су берілді

03.07.2026 17:05

Алматы облысы, Қарасай ауданының тұрғындарына ауыз су берілді. Бұл туралы әкімдік хабарлады. Соңғы күндері жауған нөсер жауын салдарынан Ақсай өзені арнасынан асып, өзенді қайта арнасына бұру жұмыстары кезінде жергілікті су құбыры желісі зақымданған еді. Ахуалды тұрақтандыру үшін мамандар үздіксіз жұмыс жүргізіп, су құбыры желісін қалпына келтірді.

Бексұлтан Ақылбек, Қарасай ауданы әкімінің орынбасары:

Таңғы сағат 4-тен бастап қазіргі таңда су бар. Бірақ мөлшері төмендеу болып тұр. Себебі таулы аймақтардан су алғаннан кейін кір су келуі мүмкін. Сол себепті давлениесін азайттық. Қазіргі таңда жағдай бірқалыпты. Ешқандай алаңдаушылық болып жатқан жоқ.

Кеше Қарасай ауданында жергілікті ауқымдағы төтенше жағдай режимі жарияланды. Таңғы сағат 7-лер шамасында Жанатұрмыс ауылындағы «Ақсай карьері» аумағында нөсер жауын мен өзен жағасының шайылуы салдарынан топырақ опырылды. Қазір мамандар ұзындығы 400 метр болатын су арнасын қалпына келтіріп жатыр. Сонымен қатар опырылып түскен аумақты бекіту және қалпына келтіру мақсатында ұзындығы 500 метр болатын арнайы технологиялық жол салынуда. Әкімдіктің мәліметінше, қазір жағдай тұрақталды.

Автор

Айдана Қуантхан

Бөлісу