Басты Жаңалықтар БҚО Шыңғырлау ауданындағы теміржол вокзалы толық жөнделді

БҚО Шыңғырлау ауданындағы теміржол вокзалы толық жөнделді

02.07.2026 17:25

Батыс Қазақстан облысы Шыңғырлау ауданында теміржол вокзалы жөндеуден кейін салтанатты түрде ашылды. Бұл – аймақта соңғы үш күнде тапсырылған үшінші бекет. Бұған дейін Тасқала, Бөрлі аудандарындағы станция ғимараттары жаңартылған еді.

Жөнделді дегенмен теміржол бекеті бастан-аяқ қайта салынған. Іші-сырты жарқырап тұр. Айналасы абаттандырылған. 90 жылдық тарихы бар вокзалдың қайта түлеп, ел игілігіне берілгеніне тұрғындар дән риза.

Кітабия Әбдуғазиева, ауыл тұрғыны:

Бұрынғы ескі нысан бір ғасырға жуық халыққа қызмет етті. Тозығы жетіп, жаңартылатын мезгіл келгені белгілі. Енді мына жаңа нысанның пайдалануға берілгені – халыққа үшін үлкен қуаныш, үлкен жетістік. Үлкен қалаларда білім алып жатқан жастар үшін де, қарапайым халық үшін де қатынас ретінде бұл өте қажет күретамыр теміржол.

Шыңғырлаулықтардың тыныс-тіршілігі теміржол желісімен тығыз байланысты. Станция арқылы 8 жолаушы пойызы өтеді. Бекет ғимаратында жолаушылар үшін жайлы әрі қауіпсіз жағдай жасалған. Мүгедектігі бар адамдарға, ана мен балаға арнайы бөлмелер қарастырылған.

Нариман Төреғалиев, облыс әкімі:

2025 жылдың қорытындысы бойынша аймағымызда теміржол көлігі қызметін 419 мың жолаушы пайдаланды. Бұл алдыңғы жылмен салыстырғанда 2 есеге өсті. Сонымен қатар жүк тасымалының көлемі де айтарлықтай артып, 5 млн тоннадан асты.

Күні-түні тер төгіп жүрген теміржолшылардың қажырлы еңбегі зор құрметке лайық. Салтанатты шарада сала үздіктері алғыс хаттармен марапатталды.

Автор

Ардақ Мұратқызы

Бөлісу