Әзербайжан Ислам азық-түлік қауіпсіздігі ұйымына қосылды

Ислам Азық-түлік қауіпсіздігі ұйымы бүгін Астанадағы штаб-пәтерінде ұйымның жаңа институционалдық дәстүрін бастады. Әзербайжан Республикасының ұйымға толыққанды мүше мемлекет ретінде қосылуына орай Туды көтеру рәсімін өткізді. Ұйымның бас директоры Берік Арын бұл қадам азық-түлік қауіпсіздігі, тұрақты ауыл шаруашылығы және ауылдық аймақтарды дамыту бағытындағы ынтымақтастықты күшейтетінін атап өтті. Рәсім барысында Әзербайжанның ұйымға қосылуы маңызды тарихи кезең ретінде бағаланды. Елдің ұйым Жарғысын ратификациялауы бағдарламаларға толық қатысуына мүмкіндік береді. Осылайша Әзербайжан аталған ұйым тарихындағы жаңа институционалдық дәстүрдің алғашқы қатысушысы атанды.