30 жылда 3,5 мыңдай заң қабылданды

30 жылдың ішінде 3,5 мыңға жуық аса қажетті заң қабылданды. Ал әрбір оныншы заңға депутаттар өздері бастамашы болды. Заң шығару жүйесінің бастауында танымал саясаткерлер, көрнекті мемлекет және қоғам қайраткерлері тұрды. Парламент – қоғамның түрлі саласындағы кәсіби мамандарды бір мақсатқа тоғыстырды. Осылайша елімізде саяси және заңнамалық тұрғыдан сапасы жоғары парламенттік мәдениет қалыптасты. Олардың жемісті еңбегі Парламент тарихында өшпес із қалдыратыны анық. Бүгін палаталардың бірлескен отырысында мемлекет басшысы ұлт мүддесі жолында қажырлы еңбек еткен депутаттарға алғысын білдірді.

Мен Парламенттегі қайнаған еңбектің, онда қабылданған әрбір заңның Тәуелсіз еліміздің келешегі үшін қаншалықты маңызды екенін жақсы түсінемін. Осы тарихи сәтке орай, ұлт мүддесін бәрінен биік қойып, елге мінсіз әрі адал қызмет еткені үшін барлық шақырылымдағы Мәжіліс пен Сенат депутаттарына шынайы ризашылығымды білдіремін.Әсіресе, Парламенттің қазіргі құрамына, яғни сіздерге алғысым зор.