Бибісара Асаубаева II дәрежелі «Барыс» орденімен марапатталды

Шахматтың блиц түрінен әлемнің 3 дүркін чемпионы Бибісара Асаубаева II дәрежелі «Барыс» орденімен марапатталды. Мемлекеттік награданы шахматшыға Премьер-министрінің орынбасары – Мәдениет және ақпарат министрі Аида Балаева Мемлекет басшысының атынан табыстады. Аида Балаева Бибісара Асаубаеваның отандық шахмат спортының дамуына қосып жатқан айрықша еңбегін атап өтті. Гроссмейстердің зияткерлік ойын арқылы Қазақстанның халықаралық аренадағы беделін арттыруға қосқан үлесі мен табандылығына тоқталды. Бибісара Асаубаева блицтен үш мәрте Әлем чемпионы атануы арқылы ең жас шахматшы ретінде Гиннестің рекордтар кітабына енген. Ал жақында Норвегияда өткен айтулы Norway Chess супертурнирінде жеңімпаз атанды.