БАҚ қызметкерлеріне пәтер кілті табысталды

Алматыда Мемлекет басшысының атынан бұқаралық ақпарат құралдары қызметкерлеріне барлығы 15 пәтер кілті табысталды. Іс-шараға Президент кеңесшісі – Баспасөз хатшысы Айбек Смадияров қатысып, кәсіби мереке иелерін құттықтады. «Алматы – қазақ баспасөзінің қарашаңырағы. Көптеген дәстүрлі ақпарат құралдарының тарихы осы шаһардан бастау алады. Мемлекет басшысы Алматы қаласының тыныс-тіршілігін әрқашан назарда ұстап отырады», -  деді ол. Еске салсақ, биыл Президенттің тапсырмасымен алғаш рет облыста жұмыс істейтін журналистерге пәтер берілді. Жалпы саны 66 баспана кілті табысталды. Алматыдан бөлек, Астана қаласында – 15, қалған 18 аймақта 2 пәтерден бөлінді.
Елена Лысенко, «Балдырған» журналының суретшісі:

Армандар орындалады! Енді мен мұны анық білемін. Бес баламен жалдамалы пәтерде жүру оңай болмады. Баспаналы болуға ұзақ уақыт ұмтылдық. Бұл мен үшін үлкен қолдау. Алғысым шексіз.