Мемлекет басшысы Mediterranean Shipping Company аға вице-президенті Эдуард Зигристті қабылдады

Мемлекет басшысы «Медитеррейниэн Шиппинг Компани» аға вице-президенті Эдуард Зигристті қабылдады. Президент контейнерлік тасымалдау бойынша әлемдегі көшбасшылардың бірі саналатын компанияның Қазақстан нарығындағы қызметіне жоғары баға беріп, бүгінде Орта дәлізді дамыту еліміз үшін стратегиялық басымдық саналатынын атап өтті. Бұл ретте Мемлекет басшысы компанияның Каспий жағалауындағы порт инфрақұрылымына инвестиция салуға қызығушылығын құптап, мұның жүк тасымалына айтарлықтай ықпал ететінін айтты. Ұзақ мерзімді инвестициялық жоспар бойынша компания логистикалық терминалдарға, темір жол активтеріне, порт инфрақұрылымына және теңіз қызметтеріне, сондай-ақ Қазақстандағы әуе арқылы жүк тасымалына қаржы құюды қарастырып отыр.