Елге қызмет – абыройлы міндет

Петропавлда да мемлекеттік қызмет саласына елеулі үлес қосқан азаматтарға құрмет көрсетілді. Олардың қатарында Мағжан Жұмабаев ауданы Полудин ауылдық округінің әкімі Мәдениет Қалиев та бар. «Мемлекеттік қызмет ардагері» төсбелгісіне ие болған ол ширек ғасырдан бері бірнеше елді мекенді басқарып келеді. Солтүстік Қазақстан облысында төрт мыңнан астам мемлекеттік қызметші еңбек етеді.

Павлодарда мемлекеттік қызмет саласының ардагерлері жастармен кездесті. Аға ұрпақ өкілдері мемлекеттік дамудың бүгінгі бағытын бағамдады. Мемлекеттік қызмет тек басқару жүйесі емес, қоғамды алға сүйреуші күш дейді олар. Ал Ертіс-Баян өңірі басқару жүйесі кадрларын даярлау ұстаханасы болып саналады. Бүгінде жастар да аға буын ізімен халыққа қалтқысыз қызмет етіп келеді.

Ал Маңғыстау облысы Мұнайлы ауданында «Адал азамат – Конституция негізі» атты зияткерлік куиз ойыны ұйымдастырылды. Сайысқа екі қала мен төрт ауданнан, облыстық басқармалардан 60-қа жуық мемлекеттік қызметші қатысты. 12 топ жеті кезең бойынша бақ сынады. Тартысты өткен сайыста «Адал айна» командасы ұшқыр ой, білім-білігімен басым түсіп, жарыс жеңімпазы атанды.