Вейптерді саудалап жүрген қылмыстық топ ұсталды

Елімізде вейптерді, оларға арналған сұйықтықтар мен хош иістендіргіштерді заңсыз сатумен айналысқан қылмыстық топтың қызметі тоқтатылды. Қаржы мониторингі агенттігінің мәліметінше, өнімдер әлеуметтік желілердегі онлайн-дүкендер арқылы сатылып, курьерлермен жеткізілген. Қылмыстық топ мүшелері қаржыны қабылдау және қолма-қол ақшаға айналдыру үшін дропперлерді пайдаланған. Заңсыз қызметтен түскен табыс көлемі 221 миллион теңгеден асқан. Сот санкциясымен күдіктілердің пәтері мен автокөлігіне тыйым салынды. Күдіктілер қамауға алынды.