Маңғыстауда 50 гектар жер мемлекет меншігіне қайтарылды

Маңғыстауда құны 870 млн теңге болатын 50 гектар жер мемлекет меншігіне қайтарылды. Көлік прокуратурасы Ақтау әуежайы маңынан қатты тұрмыстық қалдықтар полигонын орналастыру үшін заңсыз берілген жер учаскесін анықтады. Аталған аумақ 10 жыл бойы пайдаланылмаған. Құзырлы орган осы деректен кейін әуежай аймағындағы өзге де жер телімдерінің заңдылықтарын тексеруге кірісті.

Альмира Бекжан, ҚР Бас көлік прокуратурасының ресми өкілі:

Жер заңнамасын бұза отырып, бұл учаске 10 жылдан астам уақыт бойы өзінің нысаналы мақсаты бойынша пайдаланылмаған. Прокурорлық қадағалау актісі бойынша кадастрлық құны 870 млн теңгені құрайтын жер мемлекет меншігіне қайтарылды. Көлік прокуратурасы органдары мемлекеттік мүдделерді қорғауды және ұшу қауіпсіздігін қамтамасыз ете отырып, әуе маңындағы аймақтардағы бұзушылықтарды анықтау жұмыстарын жалғастыруда.