Алматы облысында 65 адам тағамнан уланды

Алматы облысында 65 адам тағамнан уланып, дәрігер көмегіне жүгінді. Олардың барлығы Боралдай кентіндегі «Алатау-4» базарында орналасқан Sushi Time дәмханасының өнімдерін тұтынған. Зардап шеккендердің 36-сы ауруханаға жатқызылса, 29 адам амбулаториялық ем алуда. Қазіргі таңда барлық науқастың жағдайы тұрақты. Оқиғаға байланысты санитариялық-эпидемиологиялық мамандар тексеру жұмыстарын бастаған. Тергеу аяқталып, оқиғаның нақты себептері анықталғанға дейін дәмхананың жұмысы уақытша тоқтатылды. Мамандар тұрғындарды қоғамдық тамақтану орындарын таңдауда сақ болуға шақырып, улану белгілері байқалған жағдайда дереу дәрігерге қаралуға кеңес береді.

Лейла Серікбаева, облыстық денсаулық сақтау басқармасы басшысының орынбасары:

Қазір науқастардың жағдайы тұрақты. Ауыр немесе аса ауыр жағдай тіркелмеді. Іле аудандық санитариялық-эпидемиологиялық бақылау басқармасы тексеру жұмыстарын бастады. Тағам өнімдерінен сынамалар алынып, зертханалық сараптама жүргізілуде.