БҚО-да ауылдық округ әкімін жұмыстан шығарды

Батыс Қазақстан облысында мас күйде көлік тізгіндеген ауылдық округ әкімі жұмысынан қуылды. Ақжайық ауданы Чапаев ауылдық округінің әкімі Биболат Зейнуллин алкогольді ішімдік ішіп, рөлге отырған. Тәртіп сақшылары оны дер кезінде ұстап, сот шешімімен жеті жылға көлік жүргізу құқығынан айырған. Әрі шенеунік бұған дейін де қызмет бабында ескерту алған. Мемлекеттік қызметкердің теріс қылығы үшін Әдеп кеңесінің мүшелері оны лауазымына сай емес деп танып, қызметінен босату туралы шешім шығарды. Сондай-ақ қалалық жұмыспен қамту және әлеуметтік бағдарламалар бөлімінің басшысы Ерболат Кәрімовке лауазымына толық сәйкес келмейтіні туралы ескерту берілді. Ол жазасы толық өтелмеген және еңбек өтілі сәйкес келмейтін адамды жұмысқа алған.