Шардаралықтар көшелер мен арықтарды тазартты

Түркістан облысының Шардара ауданында ауыл тұрғындары «Таза Қазақстан» экологиялық акциясын ұйымдастырып, көшелер мен арықтарды тазартты. Ұзыната ауылының  70-ке тарта белсенді азаматы қоршаған ортаны таза ұстау мәдениетін қалыптастыруға өз үлестерін қосып, жұмылып, 8 көше мен 3 шақырым аяқжолда қоқысты жинады. Ағаштарды кесіп, шөптерді орып шықты. Ауыл аумағындағы ирригациялық жүйелерді де ретке келтірді. Экошараға ауылдың қариялары да бір кісідей қатысып, жастарды қоршаған ортаны таза ұстауға шақырды. Сенбілік барысында жиналған 1,8 тоннаға жуық тұрмыстық қалдық арнайы полигонға шығарылды.

«Таза Қазақстан» ұлттық акциясы бүкіл елімізде жүріп жатқаны белгілі. Сондай акция бүгін Шардара ауданының Ұзыната ауылдық округінде де жүріп жатыр. Ал енді тазалық – денсаулық кепілі екенін барлығымыз да жақсы білеміз. Сондықтан барлық шардаралықты осындай акцияға шақырамын.