Қостанайға Германиядан кертағының тағы бір легін әкелді

Бүгін Қостанайға жабайы жылқы – кертағының тағы бір легі Германияның Берлин қаласынан тікелей ұшақпен жеткізілді. Бұған дейін бірінші маусымда төрт жылқы Чехиядан әкелінген еді. Сонымен биыл жеткізілген кертағы саны 8-ге жетті. Ұшақтан түсірілген жылқылар көліктерге тиеліп, Торғай өлкесіндегі Алтын Дала резерватына дейін тағы 500 шақырымнан аса жол жүреді. Жол бойы жабайы жануарлардың жай-күйін қорықшылар, ветеринар мамандар бақылап отырады. Кертағылар Қазақстан даласынан шамамен 200 жыл бұрын жойылып кеткен. Жобаның межесі – тарихи мекендеу аумағы саналатын Торғай даласында олардың популяциясын қайта қалпына келтіру. Бұған дейін жеткізілген кертағылар Алтын Дала резерваты аумағындағы реинтродукция орталығына орналастырылған. Мұнда оларды кезең-кезеңімен жергілікті климатқа бейімдеу жұмыстары жүргізіледі. Сонан соң табиғи ортаға жіберіледі. Осы жоба басталғалы Қазақстанға 22 кертағы әкелінген.

Біздің басты мақсатымыз жабайы жылқылардың табиғи популяцисының тұрақтылығын қалпына келтіру. Бағдарлама аяқталғанға дейін 40 жылқы әкелуді жоспарлап отырмыз. Әкелінген жылқылардың бәрінің жағдайы жақсы.