Мемлекет басшысы Ұлттық банкке қаржы жүйесінің орнықтылығын қамтамасыз етуді тапсырды

Ұлттық банк Үкіметпен бірге инфляция деңгейін баяулату бағытында кешенді жұмыс жүргізуде. Ұлттық банк төрағасы Тимур Сүлейменов Мемлекет басшысына есеп берді. Былтыр инфляция деңгейі 12,3 пайызға дейін бәсеңдегені баяндалды. Инфляцияның төмендеуі биыл да жалғасуда, мамыр айының мәліметіне сәйкес – 10,4 пайыз. Өткен жылы Қазақстанның алтын-валюта резерві рекордтық деңгейге жетіп, 65 миллиард доллардан асты. Ал Ұлттық қор активтері 64 миллиард долларға дейін ұлғайған. Бірыңғай жинақтаушы зейнетақы қорының активтері де 25 триллион теңгеден асқан. Мемлекет басшысы қаржы жүйесінің тұрақтылығын сақтауды, инфляцияны төмендету жұмыстарын жалғастыруды және озық цифрлық инфрақұрылымды одан әрі дамытуды тапсырды.