Лондонда машинистер тағы ереуілдетті

Лондонда метро жүргізушілері бүгін 24 сағаттық ереуілге тағы шықты. Себебі жұмыс беруші мен кәсіподақ ортақ мәмілеге келе алмай жатыр. Тұманды Альбиондағы меншікті тілшіміз қазір бізбен тікелей байланыста. Марина, қайырлы күн. Сонда машинистердің талабы қандай?

Қайырлы күн, әріптестер. Машинистер жаңа жұмыс кестесіне және төрт күндік жұмыс аптасына көшуге қарсы. Кәсіподақтың пікірінше, өзгерістер енгізілген жағдайда жұмыс ауысымдары ұзарады. Метро жүргізушілері шамадан тыс шаршап, жолаушылар қауіпсіздігіне қауіп төнуі мүмкін. Кәсіподақ оның орнына жалақыны сақтай отырып, төрт күндік 32 сағаттық жұмыс аптасын енгізуді ұсынып отыр.

Джаред Вуд, кәсіподақ ұйымының өкілі:

Біз метро басшылығымен көп жыл бойы келіссөз жүргізіп, дегенімізге жеткен едік. Енді мынадай өзгеріс ұсынылып отыр. Негізі 4 күндік жұмыс аптасын қолдаймыз. Бірақ машинистердің жұмыс жағдайы мен қауіпсіздік ережелері назардан тыс қалмауы керек.

Ереуілдің зардабын бүкіл Лондон тартуда. Салдарынан метро жұмысында іркілістер пайда болды. Көлік қатынасы компаниясының мәліметінше, проблема бүкіл желіні қамтып, біраз бағыттағы пойыз саны қысқарды. Қала тұрғындары уақытында діттеген жеріне жете алмай, автобус, такси немесе велосипедке отыруға мәжбүр.