Астана-Павлодар ақылы жолында бетон жабыны көтеріліп кетті

Астана-Павлодар ақылы жолында бетон жабыны көтеріліп кетіп, қозғалысқа қауіп төндірді. Әлеуметтік желіде тараған видеода жолдың бір жолағы бүлініп, салдарынан жүргізушілер жол жиегін айналып өтіп жатқанын көруге болады.

«ҚазАвтоЖолдың» мәліметінше, оқиға 1 маусым күні болған. Ауа температурасының +37 градусқа дейін көтерілуі бетон плиталардың кеңейтіп, жол жабынының деформациялануына себеп болған. Қазір бүлінген аумақ қоршалып, жөндеу жұмыстары басталды. Мамандар тағы екі қауіпті учаскені анықтап, алдын алу шараларын жүргізіп жатыр. Аптап ыстық жол сапасына тағы бір сын болды.