Студенттер қоқыс полигонының жұмысымен танысты

Маңғыстаулық студенттер «Таза Қазақстан» экологиялық акциясы аясында тұрмыстық қатты қалдықтар полигонының жұмысымен танысты.

Танымдық экскурсия барысында жастарға қалдықтарды қабылдау, тасымалдау және сұрыптау процесі көрсетілді. Баянды елді мекенінде орналасқан қатты тұрмыстық қалдықтарды қабылдау полигонына күн сайын қала мен аудандардан 300 тоннадан астам қоқыс жеткізіледі. Мамандардың айтуынша, оның шамамен 50-60 тоннасы ғана сұрыптаудан өтеді. Полигон аумағында қалдықтардың салмағы арнайы таразымен өлшеніп, құрамында улы әрі зиянды заттардың бар-жоғы тексеріледі. Студенттер тұрмыстық қалдықтарды азайту мен қайта өңдеудің маңызын түсінді.

Дильназ Атажан, студент:

Үйден күнделікті бөтелкені, полиэтилен пакетті бөлек, содан кейін органикалық қалдықтарды бөлек жинау керек. Бұл жерге келгеннен кейін өңдемей, бөліп жіберуге ыңғайлы болады. Ең бірінші халықтан бастау керек деп ойлаймын.