Маңғыстау облысында ауыз су тапшылығы болмайды

Маңғыстауда биыл жаз мезгілінде ауыз су тапшылығы болмайды. Өйткені өңірде соңғы екі жылда 5 жоба іске асты. Мәселен Жаңаөзен қаласын ауыз сумен қамтамасыз ету үшін тәулігіне 50 мың текше метр су өндіретін Кендірлі зауыты іске қосылды. Ал Қарақия ауданында тәулігіне 10 мың текше метр су беретін станция жұмысын бастады. Форт-Шевченко қаласында тәулігіне 5 мың текше метр ауыз су өндіретін тұщыту қондырғысы жұмыс істеп тұр. Сонымен қатар Ақтаудағы Каспий су тұщыту зауытының қуаты тәулігіне 40 мың текше метрге дейін ұлғайтылды. Бүгінде өңірде су өндіруге қатысты тағы 3 ірі жоба жүзеге асырылып жатыр.

Биыл ешқандай тапшылық болмайды. Барлық зауыттар жүйелі түрде, штаттық режимде жұмыс жасап тұр. Қазіргі таңда МАЭК кәсіпорнының аумағында 24 мың тәулігіне қуаты текше метр құрайтын су тұщыту қондырғыларының құрылысы жүргізілуде. Каспий су тұщыту зауытының қуатын 40 мың текше метрден 100 мың текше метрге ұлғайту мақсатында жобалық-сметалық құжаттамалар жасақталуда.