Оралда тыл ардагеріне құрмет көрсетілді

Казталов ауданының тумасы Сәндеш Жақашева саналы ғұмырын ұстаздыққа арнаған. Соғыс жылдары жастайынан ауыр еңбекке араласты. Өжет, қайсар боп өскен ол Алматыға барып, жоғары білім алып, ауыл мектебінде тарих пәнінен сабақ берген. Алғырлығымен көзге түсіп, бірден оқу ісінің меңгерушілігіне тағайындалған. Кейін Алма Оразбаева атындағы мектепте 20 жыл директор болып қызмет атқарған. Қала әкімі соғыс және тыл ардагерлерін әлеуметтік қолдау Президенттің, өңір басшылығының тікелей назарында екенін айтып, кейуанаға ілтипат білдірді. Еңбек ардагері де риза болып, ақ батасын берді. Өңірде 6 соғыс ардагері, 1500-ден астам тыл ардагерлері бар. Олардың әлеуметтік жағдайына тұрақты түрде көңіл бөлініп келеді. Тыл еңбеккері Сәндеш Жақашеваға да біржолғы әлеуметтік төлем табысталды.