Халықаралық олимпиадаларда әрбір екінші оқушы жүлделі болды

Халықаралық олимпиадаларға қатысқан оқушылардың әрбір екіншісі жүлделі болды. Бұл бүгінгі интеллектуалды ұрпақтың жемісі. Оқу жылын қазақстандық оқушылар осындай үлкен жетістікпен тәмамдап отыр. Осылай деген Оқу-ағарту министрі Жұлдыз Сүлейменова ел түлектерін оқу жылының аяқталуымен құттықтады. Ол Ақмола облысы Целиноград ауданы Талапкер ауылының мектеп-гимназиясында өткен соңғы қоңырауға қатысты. Бұл білім ордасы 2024 жылы «Келешек мектептері» ұлттық жобасы аясында ашылды. Білім беру ұйымы 1200 орынға арналған. Қазір мұнда 598 бала білім алып, 65 педагог еңбек етеді. Бүгін 32 түлек туған мектебімен қоштасып отыр. Олардың ішінде 2 оқушы «Алтын белгіге», 3 оқушы үздік аттестатқа үміткер.