Басты Жаңалықтар Атырау облысында 9 теміржол вокзалын жаңартуда

Атырау облысында 9 теміржол вокзалын жаңартуда

22.05.2026 13:12

Атырау облысында 9 теміржол вокзалы жаңартылып жатыр. Инфрақұрылымды жаңғырту бағдарламасы аясында «Атырау-Актөбе» және «Атырау-Астрахань» бағытындағы стансалар мен 50 жыл бұрын пайдалануға берілген облыс орталығындағы теміржол вокзалы да жөнделіп жатыр. Жобалық құны 3 млрд теңгеден асатын құрылыс келесі жылы жазда аяқталады. Әріптесім Нұрсұлтан Нұрсейіт тарқатады.

Жөнделетін 9 теміржол вокзалының ішіндегі ең маңыздысының бірі – Ганюшкино стансасы. Құрманғазы ауданындағы Ақкөл ауылында орналасқан нысан Ресеймен шекарадағы негізгі бекет саналады. 20 жылдан бері жаңғыртылмаған станцияның аумағы қазір 4 есеге үлкейген. Жаңадан ана мен бала бөлмесі, медпункт, перрон салынып, жаңа жол төселген.

Елена Әдиева, вокзал кезекшісі:

Бұрын вокзал тек 50 жолаушыларға арналған болса, қазір бірден 150 жолаушыға арналған лэд экранымыз және банкоматтар болады. Мүмкіндігі шектеулі жандарға арнайы бөлме қарастырылған.

Ал бұл Атырау қаласындағы теміржол вокзалы. Ғимарат 1972 жылы пайдалануға берілген. Тәулігіне 2,5 мыңдай жолаушы өтеді. 50 жылдан астам уақыт жаңартылмаған ғимараттың тозығы жеткен, өте тар.Енді қайта жаңғыртылған ғимарат 5 мың жолаушы қабылдайтын болады. Әзірше, жолаушылар үшін 2-3 жолға шығу бағыты өзгертіліп, билет кассалары ғимараттың алдына көшірілді.

Данияр Ғарифулла, облыстық жолаушылар көлігі және автомобиль жолдары басқармасының бөлім басшысы:

Атырау вокзалы бойынша жұмыстар екінші жартыжылдықта аяқталады деп жоспарланып отыр. Аталған жобалар EPS-контракт негізінде жүзеге асырылуда. Жөндеу және құрылыс жұмыстары барысында бүкіл заманауи стандарттар ескерілген.

Нұрсұлтан Нұрсейіт, тілші:

Тоғыз жолдың торабында тұрған Атырау стансасы арқылы тәулігіне 6 жұп жолаушылар пойызы өтеді. Жоба толық жүзеге асқанда ішкі жолаушылар тасымалы жанданып, туристер үшін де қолайлы жағдай қалыптаспақ. Жалпы биыл өңірде осындай 8 стансаның ғимаратында күрделі жөндеу жұмыстары жүруде. Олардың әрқайсысының құны көлемі мен құрылысына қарай 150-180 млн теңге шамасында.

Автор

Нұрсұлтан Нұрсейіт

Бөлісу