Инженерлік өнімді өндіру мәселесі талқыланды

Қазақстанда жылу, су және электр желілерін жаңартуға қажетті жабдықтың едәуір бөлігі әлі де шетелден сатып алынады. Оның ішінде трансформаторлар, кабель мен полимер және құбырлар, темір-бетон бұйымдары мен арматура бар. Отандық өндіріс әзірге барлық сұранысты толық қамтамасыз ете алмай отыр. Осы мәселенің шешімін табу үшін Астанада энергетика және коммуналдық секторды жаңғыртуға арналған ауқымды форум өтіп жатыр. Жиында Қазақстанның өндірістік интерактивті картасы да таныстырылды. Мамандардың айтуынша, шамамен 350 тауар түрі ел ішінде өндірілмейді немесе жеткіліксіз көлемде шығарылады. Себебі сан түрлі. Біріншіден, біздегі кәсіпорындарда заманауи  жоғары технология  жетіспейді. Екіншіден, бірқатар зауытта сапаны толық тексеретін зертхана мен техникалық бақылау жүйесі жоқ.  Енді мемлекет отандық өндірісті күшейтіп, импортқа тәуелділікті азайтуды көздеп отыр.