Түркі мемлекеттері ұйымының бейресми саммитінде қандай ұсыныстар айтылды?

Біз адамзаттың даму жолындағы бірінші және екінші индустриялық төңкерістер кезінде бодан болдық. Үшінші кезең – компьютер дәуіріне Кеңес Одағы құлаған соң барып қосылдық.

Қазір төртінші индустриялық революция уақыты. Ал бұл кезең көз ілеспес шапшаңдықпен дамып барады. Қасым-Жомарт Тоқаев жасанды интеллект саласына қатысты: «Біз өркениет көшіне ілесеміз бе, әлде артта қаламыз ба, бұл – біздің тағдырымызға тікелей әсер ететін ең маңызды мәселе», – деп жүр. Рас. Цифрлық дәуір деген әлеуметтік желілер ғана емес. Ең маңызды қыры ол емес. Бүкіл тіршілікті құратын база. Қаласаң да, қаламасаң да – айналып өте алмайтын жол.

Байқасақ, түрлі халықаралық жиындарда міндетті түрде талқыланатын тақырыпқа айналды. Себебі мемлекеттер арасындағы экономикалық келіссөздер мен уағдаластыққа керек мәліметтерді біртұтас және толымды етіп талдайды. Себебі цифрлық технологиялардың арқасында жүк тасымалы, тиісінше, сауда-саттық артады. Себебі бюрократиялық кедергілерді барынша азайтуға септеседі.

Түркістанда Түркі мемлекеттері ұйымы саммитінің басты тақырыбы да – жасанды интеллект.