Киберқылмыспен күрес: 147 млн қоңырау бұғатталған

Қазақстанда алаяқтарға SIM-карта сатып отырған 61 адам ұсталды. Олар SIM-карталар мен мессенджер аккаунттарын жаппай рәсімдеп, шетелдегі алаяқтық call-орталықтарға сатып келген. Бұл туралы бүгін елордада өткен брифингте белгілі болды. ІІМ Киберқылмысқа қарсы іс-қимыл департаментінің дерегінше, осы уақытқа дейін 147 миллион алаяқтық қоңырау бұғатталған. Ал ел аумағында арнайы жүргізілген операция барысында 827 киберқылмыс анықталып, 900-ден астам күдікті ұсталған. Оның ішінде шетел азаматтары да бар. Министрлік алдағы екі жылда киберқылмыспен күресті күшейтпек. 

 Жандос Сүйінбай, ҚР ІІМ Киберқылмысқа қарсы іс-қимыл департаментінің бастығы:

Ағымдағы жылы министрлік киберқылмысқа қарсы іс-қимыл жөніндегі 2026-2028 жылдарға арналған ведомствоаралық бағдарламаны іске асыруға кірісті. Интернет-алаяқтыққа қарсы күрестегі жұмыстың тиімділігін арттыру мақсатында жедел-профилактикалық іс-шараларды өткізудің жаңа форматы енгізілді. Яғни, бұрынғы 3 күнде өтетін іс-шара енді 3 ай көлемінде жүргізіледі. Қылмыстық істерді тергеу жалғасуда және қатаң бақылауда.