Басты Жаңалықтар Жұмысшы құқығын қорғауға бағытталған заң мақұлданды

Жұмысшы құқығын қорғауға бағытталған заң мақұлданды

14.05.2026 20:55

Енді жұмыс берушілер қызметкерлерге скринингтік тексерулерден өту үшін жұмыс орнын және орташа жалақысын сақтай отырып, арнайы демалыс беруге міндетті болады. Бүгін Сенат еңбек заңнамасын жетілдіруге бағытталған түзетулерді мақұлдады. Құжатты бірден екі оқылымда қарап, Президенттің қол қоюына жіберді. Ал скринингтен өтуге уақыт бөлмеген жұмыс беруші заң алдында жауап береді.

Ербол Тұяқбаев, ҚР Еңбек және халықты әлеуметтік қорғау бірінші вице-министрі:

Жұмысшы тиісті өтініш білдіреді. Өздеріңіз білетіндей, еңбек инспекциясы тиісті тексерумен кірген кезде нұсқама береді. Егер ол орындалмаған жағдайда әкімшілік жауапкершілік те қарастырылған. Сондықтан жұмыс берушілермен ондай сұрақтар болмауы тиіс.

Жалпы, жаңа нормалар қызметкерлердің құқықтарын қорғауды күшейтуге, еңбек қауіпсіздігін арттыруға және әлеуметтік әріптестікті дамытуға бағытталған. Сонымен қатар еңбек саласындағы құқықтар тізімі жеке өмірге қол сұқпаушылық, ар-намыс пен қадір-қасиетті құрметтеу қағидаларымен толықтырылады. Заңда өндірістегі қауіпсіздік мәселесіне де ерекше басымдық берілген. Енді ірі кәсіпорындарда мемлекеттік еңбек инспекциясымен тікелей байланыста жұмыс істейтін арнайы маман болады. Ол еңбек талаптарының бұзылуы туралы уәкілетті органдарға жедел хабарлап отырады. Бұл өндірістегі жазатайым оқиғалардың алдын алуға ықпал етеді.

Мәулен Әшімбаев, ҚР Парламенті Сенатының төрағасы:

Қаралған заң еліміздегі еңбек заңнамасын жетілдіруді көздейді. Соның аясында жұмысшы мен жұмыс берушінің құқықтарын үйлестіруге арналған нормалар топтамасы қарастырылды. Сонымен қатар жергілікті атқарушы органдардың бірқатар жаңа міндеттермен толықты. Жалпы, заң елімізде еңбек адамдарының құқықтық кепілдігін күшейтіп, жұмыс берушілердің жауапкершілігін арттыра түседі деп сенеміз.

Автор

Оңғар Алпысбайұлы

Бөлісу