Сайлау кезіндегі заң бұзушылықтар үшін жауапкершілік қатаңдатылады

Сайлау кезіндегі заң бұзушылықтар үшін жауапкершілік қатаңдатылады. Бүгін Мәжіліс тиісті құжатты бірінші оқылымда мақұлдады. Енді тек бюллетень емес, саяси науқанға бөлінген әр тиын жіті бақылауға алынбақ. Әлеуметтік желілер арқылы жасырын үгіт жүргізу, жалған сауалнама тарату немесе сайлау нәтижесін алдын ала  болжау әкімшілік жауапкершілікке әкелуі мүмкін. Бұдан былай кандидаттар сайлау қорынан тыс ақша немесе материалдық көмек алса, бұл заң бұзушылық болып қаралады. Жалпы, ұсынылған түзетулер саяси науқанды жасырын және бақылаусыз қаржыландырудың жолын кесуге бағытталған.

Серік Жұманғарин, ҚР Премьер-министрінің орынбасары – Ұлттық экономика министрі:

Сайлау қорларынан тыс қаржылық және өзге де материалдық көмек алғаны үшін жеке тұлғаларға 25, ал заңды тұлғаларға 55 айлық есептік көрсеткіш мөлшерінде әкімшілік жауапкершілік енгізілді. Бұдан басқа қолданыстағы Конституциялық заңда қаржыландыру ережелерін бұзған жағдайда, кандидатты немесе партиялық тiзiмдi тiркеу жөніндегі шешiмнiң күшiн жою туралы конституциялық жауапкершілік көзделгенін де атап өту қажет.