Түркия президенті елімізге мемлекеттік сапармен келді

Түркия президенті елімізге мемлекеттік сапармен келді. Қадірлі мейманды Астана әуежайында Қасым-Жомарт Тоқаев өзі қарсы алды. Еліміздің шекарасына енген сәттен елорда әуежайына дейін Түркия Президентінің бортына Қазақстан Республикасы Әуе қорғанысы күштерінің ұшақтары қапталдаса ұшты. Ал трап алдында Құрмет қарауылы ротасы сап түзеп, жалауша ұстаған балалар Режеп Тайип Ердоған бастаған Түркия елінің ресми делегациясына «Атажұртқа қош келдіңіз!» деп, екі тілде қошемет көрсетті. Сол сәтте Түркия мен Қазақстан туларын желбіреткен тікұшақтар алаң үстімен ұшып өтті. Ал әуежай терминалында жас өнерпаздар Түрік елінің көшбасшысына арнап «Домбыра» композициясын орындады.