Үржар әуежайы жаңғыртылады

Алакөлге баратын туристер саны төрт есеге артады. Өйткені Абай облысындағы Үржар әуежайы жаңғыртылып, сағатына 140 жолаушы қабылдайтын жаңа терминал салынбақ. Құрылыс жұмыстары мамыр айының соңында басталады. Қазір жобалық сметалық құжаты бекіп, мердігер анықталған. 1974 жылдан бері үздіксіз жұмыс істеп келе жатқан қазіргі әуежай шектеулі ғана әуе рейстерін қабылдайды. Шалғай ауданға қатынау үшін тұрғындардан оған қоса жазда туристерден де сұраныс көп. Бұған дейін әуежайдың ұшу-қону жолағы ұзартылып, түнгі рейстерге арналған жарық жүйесі орнатылған болатын.

Құрылыс жұмыстарынан кейін аумағы үлкеймейді, өйткені осы әуежайды қолданыстағы аумағына саламыз. Бүгінгі таңда мердігер анықтап, авторлық және техникалық қадағалау анықталып келісімшартқа отырған болатынбыз. Қазіргі кезде рұқсат беру құжаттары рәсімделіп жатыр. Жақын арада бізде құрылыс жұмыстары басталатын болады.