Басты Жаңалықтар «Бүкір» романының авторы өмір бойы стипендия алады

«Бүкір» романының авторы өмір бойы стипендия алады

12.05.2026 17:20

Елімізде үздік роман авторларына жыл сайын берілетін Mecenat.kz әдеби сыйлығының биылғы жеңімпазы анықталды. Байқаудың 5-маусымында журналист әрі жазушы Есболат Айдабосынның «Бүкір» романы үздік деп танылды.

Биылғы байқауға жалпы 33 өтінім түскен. Шарт бойынша кітап болып басылып шықпаған шығармалар қабылданды. Бұған дейін оқырман туындылармен аудио және электронды нұсқада танысып, әлеуметтік желіде пікір қалдырып, дауыс берді. «Бүкір» романы көпшіліктің таңдауымен ашық дауыс беру арқылы үздік деп танылды. Онда автор жылқы тағдыры арқылы адамдық қасиет, әлеуметтік теңсіздік, ар-намыс тақырыптарын терең қозғаған. Байқау қорытындысы бойынша жеңімпазға ай сайын 500 доллар көлемінде ғұмыр бойғы стипендия тағайындалды. Қазірдің өзінде «Бүкір» романын ағылшын тіліне аударуға ұсыныстар түсуде. Автордың айтуынша, туынды осы жылы кітап болып басылып шығады.

Есболат Айдабосын, «Бүкір» романының авторы, жоба жеңімпазы:

Бүкір атты мен бала күнімде, 5-6 жасымда көргенмін, өмірде болған ат. Осы Бүкірді әңгіме ретінде жазып көрейінші дедім, өйткені мен ат тақырыбын, аңшылық тақырыпты жазсам, рахаттанамын. Әңгіме ретінде бастағанмын, жазу кезінде қызық процесс болды, түсіндіріп айта алмаймын. Мен оны 15 бетке келгенде тоқтатамын деп, бір қарасам 30 бетке келдім, солай-солай 60-70 бетке кетіп қалды. Қарасам, бір шағын роман болып шыға келді.

Автор

Айжан Иманғали

Бөлісу