Еуропада кеме жолаушыларының бірінен хантавирус анықталды

Еуропа елдері бір кемеде болған жетпіс жолаушыны оқшаулап, вирусты анықтау жұмыстарын жүргізіп жатыр. Франция билігі лайнердегі бір әйелдің хантавирус жұқтырғанын растады. Париждегі аурухананың жұқпалы аурулар бөлімінде жатқан науқастың жағдайы ауыр, дейді дәрігерлер. Бельгиялық екі жолаушы да қазір мамандардың жіті бақылауында. Тест әзірге теріс нәтиже көрсетті. Бірақ, олар қырық күн карантинде болуы тиіс. «Инкубация мерзімі алты аптаға, яғни ұзаққа созылатындықтан кеме жолаушылары мен экипаж мүшелері арасында вирус жұқтырғандар әлі де анықталуы мүмкін», дейді ЕуроОдақтың денсаулық сақтау агенттігінің директоры. Биліктегілер тұрғындарды дүрлікпеуге шақырады. Дәрігерлер «жаһандық пандемия қаупі төмен» деп бағалап отыр.