Лондонда Астанада өткен Өңірлік экологиялық саммит қорытындылары талқыланды

Лондонда Астанада өткен Өңірлік экологиялық саммит қорытындылары талқыланды. Жиынға Ұлыбритания Сыртқы істер министрлігінің өкілдері, іскерлік қауымдастық, сарапшылар, журналистер және саммит делегаттары қатысты. Олар Астанада қол жеткен келісімдерді саралап, Қазақстан мен Ұлыбритания арасындағы жасыл экономика, су қауіпсіздігі және тұрақты даму салаларындағы ынтымақтастық жайын сөз етті. Лондон тарапы әсіресе, су ресурстарын тиімді басқару бағытындағы бастаманы қолдайды. Жиынға қатысқандар Астанада Халықаралық су ұйымын құру туралы жаңалыққа ерекше мән беріп отыр.
Руперт Гудман, Британ-Қазақ қоғамының төрағасы:

Ұлыбритания Қазақстанға саммитте көтерілген бірқатар бастама бойынша қолдау білдіруге мүдделі. Атап айтқанда тәжірибе алмасу және жасыл технологияларды енгізу мәселелеріне келгенде бірге жұмыс істеуге дайынбыз.

Саммитте QaJET инвестициялық платформасын құру келісілді. Оның аясында 2035 жылға қарай кемінде 10 ГВт жаңартылатын энергия көздері қуатын іске қосу, шамамен 20 млрд доллар инвестиция тарту және жыл сайынғы шығарындыларды 20 млн тоннаға қысқарту жоспарланып отыр.