Басты Жаңалықтар Астанада жазғы спорт маусымы ашылды

Астанада жазғы спорт маусымы ашылды

01.05.2026 20:11

Астанада жазғы спорт маусымы салтанатты түрде ашылды. 1 мамыр – Қазақстан халқының бірлігі күні аясында және «Таза Қазақстан» республикалық экологиялық акциясын іске асыру шеңберінде спорт фестивалі өтті. Шараға 6 жас пен 93 жас аралығындағы қала тұрғындары мен қонақтары қатысты.

Астаналықтар таң сәріден триатлон паркіне жиналды. Бірі жарыс жолына өзі дайындалса, тағы бірі балаларын спорт алаңына бастап келген. Биыл 5 шақырымдық қашықтыққа 2 мыңнан астам адам тіркелген. Солардың бірі Марат Баукенов. 70 жасқа аяқ басса да әлі тың, ширақ. Салауатты өмір салтын серік етіп, өзгелерге де үлгі болып жүр.

Марат Баукенов, Зейнеткер:

Зейнеткерлерге айтамын үйде отырмаңдар деп. Далаға шығыңдар, жүріңдер деймін. Велосипед тебіңдер. Денсаулығыңыз мықты болады.

Фестивальде ең ерекше қатысушылардың бірі – гуманоид-робот болды. Ол тек қонақтардың назарын аударып қана қоймай, жұртпен бірге жарыс жолына шықты.

Сондай-ақ қатысушылардың арасында 9 балалалы отбасы, 93 жастағы кейуана да бар.

Бекнұр Тәңірберген, қала тұрғыны:

Жарыс әдемі өтті. Өзім негізі спортшы емеспін. Бірақ осы марафондарға жиі қатысып тұрамын. Келешекте 10-20 шақырым өтуге тырысамын.

Шараның ұйымдастырушылары қалалық спорт басқармасы мен Алматы аудандық әкімдігі бұл тек бастамасы, жаз маусымына бірнеше жарыс және тұрақты жаттығу шаралары жоспарланған, - деп отыр.

Ержігіт Өсербай, қалалық Спорттық бұқаралық іс-шараларды өткізу дирекциясы басшысының орынбасары:

Алдағы жоспарда триатлон саябағында, ботаникалық және басқа да саябақтарда тегін түрде жаттығулар қарастырылған. Йогадан, скандинав жүгірісінен, сонымен қатар жекпе-жектен жаттықтырушылар тегін түрде сабақтар өткізетін болады.

Фестиваль аясында жүгіру, футбол, волейбол, баскетбол, гір көтеру және кермеге тартылудан жарыстар өтті. Концерттік бағдарлама ұйымдастырылып, лотерея жеңімпаздарына бағалы сыйлықтар табысталды.

Автор

Оңғар Алпысбайұлы

Бөлісу